سندھ کے علاقے بھریا کا امرود کبھی پاکستان سے بیرونِ ملک بھی برآمد کیا جاتا تھا، مگر آج اس کے باغ تیزی سے سکڑ رہے ہیں۔ اس زوال کی وجہ صرف قدرتی آفات نہیں بلکہ انسانی فیصلے، بدلتا زرعی رجحان اور مسلسل نظراندازی بھی ہے۔ مظفر عباسی کی رپورٹ۔
نوشہرو فیروز میں انگریز دورِ حکومت کی قائم کردہ تاریخی پرانی کلیکٹر آفس کی عمارت ضلعی انتظامیہ اور محکمہ ثقافت کی سنگین بے توجہی کے باعث اپنی بقا کی آخری سانسیں لے رہی ہے۔ یہ عمارت 1893ء میں تعمیر کی گئی تھی جو طویل عرصے تک سرکاری انتظامی مرکز کے طور پر استعمال ہوتی رہی۔ قیامِ پاکستان کے بعد بھی یہاں مختارکار آفس اور الیکشن آفس قائم کیے گئے۔ تاہم، سال 2007ء میں محترمہ بینظیر بھٹو کی شہادت کے بعد ملک گیر احتجاج اور ہنگاموں کے دوران اس تاریخی عمارت کو شرپسندوں نے نذرِ آتش کر دیا تھا، جس کے بعد سے یہ رفتہ رفتہ کھنڈر کا منظر پیش کرنے لگی۔
مقامی شہریوں نے لوک سجاگ کو بتایا کہ طویل عرصے سے لاوارث چھوڑی گئی اس عمارت سے قیمتی لوہا، قدیم دروازے اور دیگر سامان چوری ہوچکا ہے۔
افسوسناک صورتحال یہ ہے کہ اب پورے شہر کے گٹر کا گندا پانی اس تاریخی عمارت کے احاطے اور اندرونِ حصوں میں داخل ہو رہا ہے، جس کی وجہ سے اس کی صدیوں پرانی بنیادیں شدید کمزور ہو چکی ہیں اور عمارت کا کوئی بھی حصہ کسی بھی وقت زمین بوس ہو سکتا ہے۔
دلچسپ مگر افسوسناک بات یہ ہے کہ سال 2023ء میں حکومت کی جانب سے اس عمارت کو باقاعدہ "ثقافتی ورثہ" قرار دیا گیا تھا، لیکن اس اعلامیے کے باوجود محکمہ ثقافت اور ضلعی انتظامیہ کی جانب سے تاحال اس کی بحالی، مرمت یا حفاظت کے لیے کوئی عملی قدم نہیں اٹھایا گیا۔
